மதுரை மாவட்டத்தில் விதிகளை மீறி அதிகளவில் செம்மண் மற்றும் கற்கள் வெட்டி எடுக்கப்பட்டதாகப் பதிவு செய்யப்பட்ட வழக்கின் அடிப்படையில், தற்போதைய மதுரை வடக்கு மாவட்ட திமுக செயலாளரும், திமுக உயர்நிலை செயல்திட்டக் குழு உறுப்பினரும், முன்னாள் வணிகவரி மற்றும் பதிவுத்துறை அமைச்சருமான பி. மூர்த்தியின் இல்லத்தில் மாவட்ட குற்றப்பிரிவு காவல்துறையினர் இன்று அதிரடிச் சோதனையில் ஈடுபட்டுள்ளனர்.

வழக்கின் பின்னணி:

மதுரை மாவட்டம் பாலமேடு மற்றும் அலங்காநல்லூர் ஆகிய பகுதிகளில் உள்ள செம்மண் மற்றும் கல்குவாரிகளில், அரசு விதிமுறைகளை மீறி நிர்ணயிக்கப்பட்ட அளவை விட அதிகப்படியான கனிமவளங்கள் வெட்டி எடுக்கப்பட்டதாகப் புகார்கள் எழுந்தன. இது தொடர்பாக மாவட்ட குற்றப்பிரிவு காவல்துறையினர் வழக்குப் பதிவு செய்து தீவிர விசாரணை நடத்தி வருகின்றனர்.

வீட்டில் சோதனை மற்றும் ஆவணங்கள் ஆய்வு:


இந்த வழக்கின் தொடர்ச்சியாக, மதுரை ஐயர் பங்களா பகுதியில் உள்ள ரோஜா வீதியில் அமைந்துள்ள முன்னாள் அமைச்சர் பி. மூர்த்தியின் வீட்டிற்கு இன்று காலை வந்த மாவட்ட குற்றப்பிரிவு காவல்துறையினர் சோதனையைத் தொடங்கினர். குறிப்பாக, கல்குவாரி டெண்டர் தொடர்பான முக்கிய ஆவணங்கள் மற்றும் ஒப்பந்தங்கள் குறித்து காவல்துறையினர் தீவிர ஆய்வு மேற்கொண்டு வருவதாகக் காவல்துறை வட்டாரங்கள் தெரிவிக்கின்றன. முன்னாள் அமைச்சரும், தற்போதைய மாவட்டச் செயலாளருமான மூர்த்தியின் வீட்டில் சோதனை நடைபெற்று வருவதால், அசம்பாவிதங்களைத் தவிர்க்கும் பொருட்டு அவரது வீட்டின் முன்பாகப் பலத்த காவல்துறை பாதுகாப்பு போடப்பட்டுள்ளது. இதனால் அப்பகுதியில் பெரும் பரபரப்பு நிலவி வருகிறது.

அரசியல் மற்றும் கட்சிப் பின்னணி:
தற்போது திமுகவில் மதுரை வடக்கு மாவட்டச் செயலாளராகவும், திமுக உயர்நிலை செயல்திட்டக் குழு உறுப்பினராகவும் பொறுப்பு வகித்து வரும் பி. மூர்த்தி, 2021-ஆம் ஆண்டு நடைபெற்ற சட்டமன்றத் தேர்தலில் மதுரை கிழக்குத் தொகுதியில் போட்டியிட்டு வெற்றி பெற்று, வணிகவரி மற்றும் பதிவுத்துறை அமைச்சராகப் பணியாற்றியவர். முன்னதாக, 2006-ஆம் ஆண்டு சோழவந்தான் தொகுதியிலும், 2016-ஆம் ஆண்டு மதுரை கிழக்குத் தொகுதியிலும் போட்டியிட்டுச் சட்டமன்ற உறுப்பினராகத் தேர்ந்தெடுக்கப்பட்டவர்.

2011 மற்றும் 2026 ஆகிய ஆண்டுகளில் நடைபெற்ற சட்டமன்றத் தேர்தல்களில் மதுரை கிழக்குத் தொகுதியில் போட்டியிட்டுத் தோல்வியடைந்தார் என்பது குறிப்பிடத்தக்கது.

செய்திகள் : காளமேகம் / எதிரொலி . இன் / 8939476777

By admin

Leave a Reply

Your email address will not be published. Required fields are marked *

You missed