நடிகர் தனுஷின் 55-வது திரைப்படமான ‘ஓம்’ (Om) வெளியீட்டை முன்னிட்டு, மதுரையில் உள்ள திரையரங்குகளில் அவரது ரசிகர்கள் உற்சாகக் கொண்டாட்டங்களில் ஈடுபட்டு வருகின்றனர். இதன் ஒரு பகுதியாக, மதுரை திருப்பரங்குன்றம் பகுதியில் ரசிகர்கள் வைத்துள்ள பிரம்மாண்ட பிளக்ஸ் பேனர் ஒன்று தற்போது சமூக வலைதளங்களிலும், அரசியல் வட்டாரங்களிலும் பேசுபொருளாகியுள்ளது.

திரையரங்கு வளாகங்களில் டிஜே (DJ) இசை முழங்க ரசிகர்கள் ஆடிப் பாடி திரைப்படத்தை வரவேற்று வரும் நிலையில், அப்பகுதியில் வைக்கப்பட்டிருந்த பேனரில் “TN 58 CM 2031” என்ற வாசகம் இடம்பெற்றுள்ளது. ‘TN 58’ என்பது மதுரை தெற்கு மற்றும் திருப்பரங்குன்றம் பகுதிகளுக்கான வட்டாரப் போக்குவரத்து வாகனப் பதிவு எண்ணாகும். அதனுடன் ‘CM 2031’ எனக் குறிப்பிடப்பட்டிருப்பது, நடிகர் தனுஷ் எதிர்காலத்தில் அரசியலுக்கு வருவாரா? 2031-ஆம் ஆண்டு நடைபெறும் சட்டமன்றத் தேர்தலில் முதலமைச்சர் வேட்பாளராகக் களமிறங்குவாரா? என்ற எதிர்பார்ப்பை அவரது ரசிகர்கள் வெளிப்படுத்தும் விதமாக அமைந்துள்ளது.

ஏற்கெனவே தமிழ் சினிமாவின் முன்னணி நடிகர்கள் பலர் அரசியலில் தடம் பதித்து வரும் சூழலில், தனுஷ் ரசிகர்களின் இந்தச் செயல் கவனத்தை ஈர்த்துள்ளது. ஒருபுறம் தனுஷின் ‘ஓம்’ திரைப்படம் திரையரங்குகளில் கொண்டாடப்பட்டு வரும் வேளையில், மறுபுறம் ரசிகர்களின் இந்த அரசியல் ரீதியான பேனர் வாசகங்கள் மதுரை அரசியல் வட்டாரங்களில் விவாதத்தையும் பரபரப்பையும் ஏற்படுத்தியுள்ளன.

இது குறித்து, நடிகர் தனுஷ் தரப்பிலிருந்தோ அல்லது அவரது ரசிகர் மன்றத் தலைமை நிர்வாகிகளிடமிருந்தோ அதிகாரப்பூர்வ விளக்கம் எதுவும் வெளியாகாத நிலையில், ரசிகர்களின் தனிப்பட்ட ஆர்வத்தின் வெளிப்பாடாகவே இந்த பேனர் வைக்கப்பட்டிருக்கலாம் எனக் கூறப்படுகிறது.

செய்திகள் : காளமேகம் / எதிரொலி . இன் / 8939476777

By admin

Leave a Reply

Your email address will not be published. Required fields are marked *

You missed