பத்திரப்பதிவுத் துறையை தனியார் வசம் ஒப்படைக்கும் முயற்சியைக் கைவிட வலியுறுத்தல் – மதுரையில் அரசு உரிமம் பெற்ற ஆவண எழுத்தாளர்கள் கருப்பு பேட்ஜ் அணிந்து கவன ஈர்ப்பு போராட்டம்
தமிழ்நாடு பத்திரப்பதிவுத் துறையைத் தனியார் நிறுவனங்களிடம் ஒப்படைக்கும் அல்லது வெளிமுகமைகள் (Outsourcing) மூலம் நடைமுறைப்படுத்தும் அரசு திட்டங்களுக்கு எதிர்ப்பு தெரிவித்து, மதுரையில் உள்ள அனைத்து சார்பதிவாளர் (Sub-Registrar) அலுவலகங்களிலும் அரசு உரிமம் பெற்ற ஆவண எழுத்தாளர்கள் மற்றும் நகல் தயாரிப்பாளர்கள் சார்பாக இன்று கருப்பு பேட்ஜ் அணிந்து கவன ஈர்ப்பு போராட்டம் நடைபெற்றது
மதுரையில் உள்ள அனைத்து சார்பதிவாளர் அலுவலகங்களிலும் பல்லாயிரக்கணக்கான ஆவண எழுத்தாளர்கள் தங்கள் வழக்கமான பணிகளைப் பாதிப்பின்றி மேற்கொண்டு, அதே வேளையில் அரசின் கவனத்தை ஈர்க்கும் வகையில் சட்டையில் கருப்பு பேட்ஜ் அணிந்து போராட்டத்தில் ஈடுபட்டனர்.
போராட்டத்தில் முன்வைக்கப்பட்ட முதன்மையான கோரிக்கைகள்:
பொதுமக்களின் கூடுதல் நிதிப் சுமை: பத்திரப்பதிவு மற்றும் தரவு மேலாண்மை சேவைகள் தனியார் நிறுவனங்களின் கைகளுக்குச் சென்றால், சாதாரண பொதுமக்கள் செலுத்தும் சேவைக் கட்டணங்கள் பெருமளவில் உயரும் ஆபத்து உள்ளது.
தகவல் பாதுகாப்பு & முறைகேடுகள் அச்சம்: மக்களின் நிலம், சொத்து உரிமைகள் மற்றும் வில்லங்கச் சான்றுகள் தொடர்பான முக்கியமான தரவுகள் தனியார் வசம் செல்வது, எதிர்காலத்தில் ஆவண முறைகேடுகளுக்கும் பொதுமக்களின் பாதுகாப்புக்கும் பெரும் அச்சுறுத்தலாக அமையும்.
வாழ்வாதார இழப்பு: பல்லாண்டுகளாக அரசின் உரிமம் பெற்று இத்துறையை நம்பி வாழும் பல்லாயிரக்கணக்கான ஆவண எழுத்தாளர்கள், நகல் தயாரிப்பாளர்கள் மற்றும் அவர்களின் உதவியாளர்களின் வாழ்வாதாரம் முற்றிலுமாக முடங்கும் நிலை ஏற்படும்.
சங்கப் பிரதிநிதிகளின் முக்கிய எச்சரிக்கை:
”பொதுமக்களின் பாதுகாப்பு மற்றும் உரிமம் பெற்ற ஆவண எழுத்தாளர்களின் வாழ்வாதாரத்தைப் பாதுகாக்கும் வகையில், பத்திரப்பதிவுத் துறையைத் தனியார்மயமாக்கும் நடவடிக்கையைத் தமிழ்நாடு அரசு உடனடியாகக் கைவிட வேண்டும். இக்கோரிக்கை நிறைவேற்றப்படாவிட்டால், அடுத்தகட்டமாகத் தமிழ்நாடு தழுவிய வேலைநிறுத்தம் மற்றும் முற்றுகைப் போராட்டங்கள் முன்னெடுக்கப்படும்.”
இன்றைய கவன ஈர்ப்புப் போராட்டத்தின் மூலம், பொதுமக்களின் நலன் கருதி அரசும் பதிவுத்துறையும் நல்லதொரு முடிவை விரைந்து எடுக்க வேண்டும் என்று வலியுறுத்தப்பட்டுள்ளது.
செய்திகள் : காளமேகம் / எதிரொலி . இன் / 8939476777