திருச்சிராப்பள்ளி புத்தூர் பகுதியில் அமிர்தம் சமூக சேவை அறக்கட்டளை நிர்வாக அறங்காவலர் யோகா ஆசிரியர் விஜயகுமார் வழக்கறிஞர் சித்ரா விஜயகுமார் கீர்த்தனா உள்ளிட்டோர் குடும்பம் சகிதமாக தமிழர் பண்பாட்டில் புழங்கு பொருட்கள் கருப்பொருளில் இல்லத்திலேயே புழங்கு பொருட்கள் காட்சியகத்தை அமைத்து தமிழர் வாழ்வியலை எடுத்துரைத்து வருகிறார்கள்.
புழங்கு பொருட்கள் காட்சியகத்தை தமிழ்நாடு பத்திரிக்கையாளர் சங்கத் தலைவர் டி.எஸ்.ஆர்.சுபாஷ் மற்றும் உலக அமைதி அமைப்பு சமூக ஆர்வலர் சோனியா மல்ஹார், சாந்திவனம் இயக்குனர் அரசப்பன் மற்றும் பழனிச்சாமி ஆகியோர் பார்வையிட்டு புழங்கு பொருட்கள் காட்சியகம் குறித்து கேட்டறிந்தனர். புழங்குப் பொருட்கள் காட்சியகம் குறித்து அமிர்தம் சமூக சேவை அறக்கட்டளை நிர்வாக அறங்காவலர் யோகா ஆசிரியர் விஜயகுமார் பேசுகையில்,
தமிழர் பண்பாடு என்பது தொன்மையான வரலாறு, உயர்ந்த நாகரிகம், இயற்கையோடு இணைந்த வாழ்வியல் மற்றும் தனித்துவமான மரபுகளைக் கொண்டது. தமிழர்கள் வாழ்ந்த நிலம், பயன்படுத்திய பொருட்கள், உண்ணும் உணவு, அணியும் ஆடை, மேற்கொண்ட தொழில்கள், கொண்டாடிய விழாக்கள் என அனைத்தும் அவர்களின் பண்பாட்டுச் சிறப்புகளை வெளிப்படுத்துகின்றன. இவற்றில் புழங்கு பொருட்கள் முக்கியமான இடத்தைப் பெற்றுள்ளன.
புழங்கு பொருட்கள் என்பது நம் முன்னோர்கள் தங்களுடைய அன்றாட வாழ்க்கையில் பயன்படுத்திய பொருட்களைக் குறிக்கிறது. அவை வெறும் பயன்பாட்டுப் பொருட்கள் மட்டுமல்ல; தமிழர்களின் அறிவியல் சிந்தனை, கலைத்திறன், தொழில்நுட்ப வளர்ச்சி, சுற்றுச்சூழல் பாதுகாப்பு மற்றும் சமூக வாழ்வியலின் அடையாளங்களாகவும் விளங்குகின்றன.
தமிழர்களின் பாரம்பரிய புழங்கு பொருட்கள் பல்வேறு வகைகளாகப் பிரிக்கப்படுகின்றன. மண், மரம், கல், உலோகம், மூங்கில், பனை, தென்னை, சணல் போன்ற இயற்கைப் பொருட்களைக் கொண்டு தயாரிக்கப்பட்ட பொருட்கள் அன்றாட வாழ்க்கையில் பெருமளவில் பயன்படுத்தப்பட்டன.
சமையல் மற்றும் உணவுப் பயன்பாட்டுப் பொருட்களில், மண் பானை, அடுப்பு, அம்மிக்கல், ஆட்டுக்கல், உரல், உலக்கை, முறம், சுளகு, அஞ்சறைப்பெட்டி, அரிசிப் பானை, தண்ணீர்க் குடம், செம்பு, பித்தளைப் பாத்திரங்கள் போன்றவை தமிழர்களின் சமையல் பண்பாட்டை வெளிப்படுத்துகின்றன.
வீட்டு உபயோகப் பொருட்களில், மரப்பெட்டி, கட்டில், மரப்பலகை, விளக்கு, கைவிசிறி, பாய், தலையணை, மர நாற்காலி, ஊஞ்சல் போன்றவை பாரம்பரிய வீட்டு வாழ்க்கையின் அடையாளங்களாக விளங்கின.
வேளாண் விவசாயப் பொருட்களில் கலப்பை, மண்வெட்டி, அரிவாள், கடப்பாரை, ஏர், நுகத்தடி, தானியங்களை அளக்கும் மரக்கால், படி போன்றவை தமிழர்களின் வேளாண் அறிவையும் தொழில்நுட்பத்தையும் எடுத்துக்காட்டுகின்றன.
அளவீட்டுப் பொருட்களில், மரக்கால், படி, ஆழாக்கு, உழக்கு, நாழி, துலாக்கோல், நிறுத்துக்கற்கள் என முகத்தல் அளவை நீட்டல் அளவை, நிறுத்தல அளவைகள் வணிகம் மற்றும் பொருளாதார நடவடிக்கைகளில் பயன்படுத்தப்பட்டன.
விளையாட்டுப் பொருட்களில், பல்லாங்குழி, தாயம், பரமபதம், பம்பரம், கில்லி, மண்பொம்மைகள், மரக்குதிரை, தகரக் கார் போன்றவை குழந்தைகளின் விளையாட்டு மற்றும் அறிவாற்றல் வளர்ச்சியுடன் தொடர்புடையவை ஆகும்.
தமிழர்கள் இயற்கையில் கிடைக்கும் பொருட்களைப் பயன்படுத்தி தங்களுடைய தேவைகளை நிறைவு செய்தனர். பனை ஓலைகளால் கூடை, பெட்டி, விசிறி, பாய் போன்ற பொருட்களை உருவாக்கினர். மூங்கிலால் கூடை, முறம், ஏணி, வேலி போன்றவற்றைத் தயாரித்தனர். மண் பானைகள் உணவு சமைப்பதற்கும் தண்ணீர் சேமிப்பதற்கும் பயன்பட்டன. மரம் மற்றும் கல் போன்ற பொருட்கள் வீட்டு உபயோகத்திற்கும் தொழில் கருவிகளுக்கும் பயன்படுத்தப்பட்டன.
இவ்வாறு இயற்கை வளங்களை அளவோடு பயன்படுத்தி, மீண்டும் இயற்கையோடு இணையும் வகையில் பொருட்களை உருவாக்கிய தமிழர்களின் வாழ்வியல் சுற்றுச்சூழல் பாதுகாப்பிற்கு முன்னுதாரணமாக விளங்குகிறது.
பழங்காலப் புழங்கு பொருட்களில் அறிவியல் சிந்தனைகள் பொதிந்துள்ளன. மண் பானைகளின் நுண்துளைகள் மூலம் நீர் ஆவியாகும்போது ஏற்படும் குளிர்ச்சி, தண்ணீரை இயற்கையாகக் குளிர்விக்க உதவுகிறது.
அம்மிக்கல் மற்றும் ஆட்டுக்கல் போன்ற கருவிகள் உணவுப் பொருட்களை அரைப்பதற்கும் பதப்படுத்துவதற்கும் பயன்பட்டன. மரக்கால், படி போன்ற அளவீட்டுக் கருவிகள் வணிகத்தில் அளவுத் தரத்தைப் பேண உதவின.
பல்லாங்குழி போன்ற விளையாட்டுகள் எண்ணிக்கை, கணிதச் சிந்தனை, திட்டமிடுதல் மற்றும் கவனத்திறனை வளர்க்கும் வகையில் அமைந்துள்ளன. இதனால் புழங்கு பொருட்கள் தமிழர்களின் நடைமுறை அறிவுக்கும் அனுபவக் கல்விக்கும் சான்றுகளாக விளங்குகின்றன.தமிழர்களின் குடும்ப வாழ்க்கை, உணவுப் பழக்கவழக்கங்கள், திருமண மரபுகள், திருவிழாக்கள், விவசாயம், வணிகம் மற்றும் கலைகளுடன் புழங்கு பொருட்கள் நெருங்கிய தொடர்பைக் கொண்டுள்ளன.
திருமண விழாக்களில் பயன்படுத்தப்படும் செம்பு, பித்தளைப் பாத்திரங்கள், பாரம்பரிய விளக்குகள், மரப்பெட்டிகள் போன்றவை குடும்ப மரபுகளையும் சமூகப் பண்பாட்டையும் எடுத்துரைக்கின்றன.
கிராமப்புறங்களில் பயன்படுத்தப்பட்ட முறம், உரல், உலக்கை, பனைப் பொருட்கள் போன்றவை பெண்களின் உழைப்பு, குடும்பப் பொருளாதாரம் மற்றும் சமூக வாழ்க்கையின் வரலாற்றை வெளிப்படுத்துகின்றன. இன்றைய நவீன வாழ்க்கையில் பல பாரம்பரியப் புழங்கு பொருட்கள் பயன்பாட்டிலிருந்து மறைந்து வருகின்றன. அவற்றின் இடத்தை நவீன இயந்திரங்கள், பிளாஸ்டிக் பொருட்கள் மற்றும் மின்னணு சாதனங்கள் பிடித்துள்ளன.
இதனால் நம் முன்னோர்களின் வாழ்வியலை எடுத்துரைக்கும் பல பொருட்கள் அழியும் நிலையில் உள்ளன. இவற்றைப் பாதுகாப்பது நமது வரலாற்றையும் பண்பாட்டையும் பாதுகாப்பதற்குச் சமமானதாகும்.
பழங்காலப் புழங்கு பொருட்களைச் சேகரித்து வகைப்படுத்தி, அவற்றின் பெயர், பயன்பாடு, தயாரிப்பு முறை மற்றும் வரலாற்றுத் தகவல்களுடன் பாரம்பரியப் பொருட்களை என்றவரை சேகரித்து காட்சியகமாக வைத்துள்ளோம். இக்காட்சியகம் பள்ளி மற்றும் கல்லூரி மாணவர்களுக்கு நேரடி வரலாற்றுப் பாடமாக அமையும். இளம் தலைமுறையினர் தங்கள் முன்னோர்களின் அறிவையும் வாழ்க்கை முறையையும் புழங்குப் பொருட்கள் மூலம் அறிந்துகொள்ளலாம் .தமிழர் பண்பாட்டில் புழங்கு பொருட்கள் என்பது கடந்த காலத்தின் நினைவுச் சின்னங்கள் மட்டுமல்ல; அவை நமது அடையாளம், அறிவு, நாகரிகம் மற்றும் பாரம்பரியத்தின் உயிருள்ள சான்றுகளாகும்.நம் முன்னோர்கள் பயன்படுத்திய ஒவ்வொரு பொருளிலும் ஒரு வரலாறு, ஒரு தொழில்நுட்பம், ஒரு பண்பாடு பொதிந்துள்ளது. அவற்றைப் பாதுகாத்து அடுத்த தலைமுறைக்குக் கொண்டு செல்வது ஒவ்வொரு தமிழரின் கடமையாகும் என்றார்.
செய்திகள் : விஜயகுமார் / எதிரொலி