இந்தியா கூட்டணி தலைவர்களின் பரிசீலனைக்காக விடுதலைச் சிறுத்தைகள் கட்சி சார்பில் பல்வேறு கோரிக்கைகள் முன் வைக்கப்பட்டுள்ளதாக, அக்கட்சியின் நிறுவனர்-தலைவர் டாக்டர் தொல்.திருமாவளவன், எம்.பி., தெரிவித்துள்ளார்.
இதுகுறித்து அவர் வெளியிட்டுள்ள உரையில் கூறியிருப்பதாவது:
2023 – ம் ஆண்டு மோடி அரசால் இயற்றப்பட்ட சட்டத்தின் கீழ் நடைபெற்று வரும் SIR நடவடிக்கைகளின் சட்டப்பூர்வத் தன்மை குறித்து, இரண்டு தேர்தல் ஆணையர்கள் தெரிவித்த ஆட்சேபனைகள் தொடர்பாக, தி இந்தியன் எக்ஸ்பிரஸ் வெளியிட்டுள்ள செய்திகள் பல்வேறு தீவிரமான கேள்விகளை எழுப்பியுள்ளன.
இந்தத் தகவல்கள் அரசியலமைப்பு நெருக்கடியை உருவாக்கியுள்ளன. கோடிக்கணக்கான வாக்காளர்களின் பெயர்கள் வாக்காளர் பட்டியலிலிருந்து நீக்கப்பட்டிருப்பது, பல மாநிலங்கள் மற்றும் யூனியன் பிரதேசங்களில் நடைபெற்ற தேர்தல்களின் செல்லுபடியாகும் தன்மை குறித்தும் தீவிரமான கேள்விகளை எழுப்புகிறது.
அந்தத் தேர்தல்களைச் செல்லாது என அறிவிக்க வேண்டும் என்ற திரு. அரவிந்த் கெஜ்ரிவாலின் கோரிக்கை சட்டரீதியாக நியாயப்படுத்த கூடியதாக இருக்கலாம். ஆனால், அத்தகைய கோரிக்கையை நடைமுறைப்படுத்துவது மிகவும் கடினமானதாக இருக்கும்.
பீகார் மற்றும் தமிழ்நாட்டில் நடைபெற்று வரும் SIR நடவடிக்கைகளுக்கு எதிராக விசிக சார்பில் உச்சநீதிமன்றத்தில் வழக்குகள் தொடரப்பட்டுள்ளன. எனினும், SIR-க்கு எதிரான வழக்குகளில் இதுவரை உச்சநீதிமன்றம் நிவாரணம் வழங்கவில்லை. இது அரசியலமைப்பு நீதிமன்றத்தின் அணுகுமுறை குறித்து தீவிரமான கவலைகளை ஏற்படுத்துகிறது.
சில நாட்களுக்கு முன்பு, மூன்று தேர்தல் ஆணையர்களும் ஒன்றாக ஊடகங்கள் முன்பு தோன்றி கூட்டறிக்கை வெளியிட்டனர். இது வெறுமனே தேர்தல் ஆணையர்களுக்கு இடையிலான கருத்து வேறுபாடு அல்லது சமரசம் தொடர்பான பிரச்சினை அல்ல. இது நமது தேர்தல் ஜனநாயகத்தின் அடித்தளத்தையே பாதிக்கும் ஒரு பிரச்சினையாகும்.
விசிக முன்வைத்த 8 கோரிக்கைகள்:
- சட்டவிரோத நடவடிக்கைகளில் ஈடுபட்டதாகக் கூறப்படும் தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்றும், அவர் கைது செய்யப்பட வேண்டும் என்றும் கோரிக்கை விடுக்க வேண்டும்.
- தற்போது நடைபெற்று வரும் SIR நடவடிக்கைகளை உடனடியாக நிறுத்த வேண்டும்.
- வாக்காளர் பட்டியலிலிருந்து நீக்கப்பட்ட வாக்காளர்களின் சமூகப் பிரிவு வாரியான விவரங்களை வெளியிட வேண்டும்.
- நீக்கப்பட்டுள்ள 13 கோடி வாக்காளர்களின் பெயர்களையும் மீண்டும் வாக்காளர் பட்டியலில் சேர்க்க வேண்டும்.
- வாக்களிக்கும் உரிமையை அடிப்படை உரிமையாக மாற்ற வேண்டும்.
- ஞானேஷ் குமாரை தலைமைத் தேர்தல் ஆணையராக நியமித்ததற்காக பிரதமரும் உள்துறை அமைச்சரும் மக்களிடம் மன்னிப்பு கோர வேண்டும்.
- தலைமைத் தேர்தல் ஆணையர் மற்றும் பிற தேர்தல் ஆணையர்கள் சட்டம், 2023-ஐ திரும்பப் பெற வேண்டும்.
- ஜனநாயகத்தைப் பாதுகாக்கும் வகையில் நாடு தழுவிய போராட்டத்தை அறிவிக்க வேண்டும்.
இவ்வாறு இந்தியா கூட்டணி மேற்கொள்ள வேண்டிய நடவடிக்கைகள் குறித்து விசிக சார்பில் கோரிக்கைகள் முன்வைக்கப்பட்டுள்ளதாக டாக்டர் தொல்.திருமாவளவன் தெரிவித்துள்ளார்.
லெனின் லோகேஷ் / எதிரொலி . இன் /
8939476777