மதுரையில் இயக்கப்பட்ட ” வெற்றிப் பயணம் ” என்ற புத்தம் புதிய அரசுப் பேருந்து திடீரென நடுவழியில் பழுதாகி நின்றதால், பயணிகள் மற்றும் போக்குவரத்து காவல்துறையினர் இணைந்து அதைத் தள்ளிச் சென்ற சம்பவம் பெரும் பரபரப்பையும் போக்குவரத்து நெரிசலையும் ஏற்படுத்தியுள்ளது.
சம்பவத்தின் விவரம்:
மதுரை பெரியார் பேருந்து நிலையத்திலிருந்து புதுக்குளம் நோக்கி, தமிழ்நாடு அரசுப் போக்குவரத்து கழகத்தின் செக்கானூரணி கிளையைச் சேர்ந்த TN 58N3385 புத்தம் புதிய ‘வெற்றிப் பயணம்’ பேருந்து ஒன்று புறப்பட்டுச் சென்றது. காளவாசலில் இருந்து பி.பி. சாவடி வழியாகப் பேருந்து சென்றுகொண்டிருந்தபோது, பி.பி. சாவடி அருகே திடீரென எஞ்சின் கோளாறு ஏற்பட்டு நடுரோட்டில் பழுதாகி நின்றது.
கடும் போக்குவரத்து நெரிசல்:
பேருந்து சாலையில் குறுக்கே நின்றதால், அப்பகுதியில் போக்குவரத்து கடுமையாகப் பாதிக்கப்பட்டு, காளவாசல் வரை சுமார் ஒரு கிலோமீட்டருக்கும் மேலாக வாகனங்கள் நீண்ட வரிசையில் நின்றன. இதனால், அலுவலகம் மற்றும் பள்ளி, கல்லூரிகளுக்குச் சென்ற பயணிகள் கடும் அவதிக்கு உள்ளாகினர்.
தள்ளிச் சென்ற பயணிகள் & காவலர்கள்:
உடனடியாகச் சம்பவ இடத்திற்கு வந்த காளவாசல் போக்குவரத்துப் பிரிவு காவலர், அங்கிருந்த பயணிகள் மற்றும் பொதுமக்கள் உதவியுடன் பழுதான பேருந்தைச் சாலையில் இருந்து ஓரமாகத் தள்ளிச் சென்று நிறுத்தினார்.
” வெற்றிப் பயணம் என்ற பெயரில் புதிதாகத் தொடங்கப்பட்ட பேருந்து, இயக்கப்பட்ட சில நாட்களிலேயே பழுதாகி நடுவழியில் ‘தோல்விப் பயணமாக’ நின்றதைச் சுட்டிக்காட்” டி பொதுமக்கள் அதிருப்தி தெரிவித்தனர்.
பொதுமக்களின் கோரிக்கை:
பேருந்துகளைப் பணிமனையிலிருந்து இயக்கத் தொடங்கும் முன்பாக, அவற்றைப் போக்குவரத்து கிளை மேலாளர்கள் மற்றும் பொறியாளர்கள் முறையாகப் பராமரித்து, ஆய்வு செய்த பிறகே தடங்களில் இயக்க நடவடிக்கை எடுக்க வேண்டும் என அப்பகுதி மக்களும் பயணிகளும் கோரிக்கை விடுத்துள்ளனர்.